Podkasten Bok & bibliotek #52
Høyr Sommarles-debatten her!
I episode #52 av podkasten Bok & bibliotek kan du høyra opptak av Sommarles-debatten vi arrangerte saman med Periskop på sentralen i Oslo onsdag 27. mai.
Utgangspunktet for episode #52 av podkasten Bok & bibliotek er Oddmund Kårevik sitt innlegg Ta Sommarles til nye høgder! som blei publisert på bokogbibliotek.no og periskop.no i april.
Onsdag 27. april arrangerte vi til debatt og idémyldring med eit panel beståande av bibliotekarane Oddmund Kårevik og Ragnhild Malfang, leseforskar Tove Stjern Frønes, Bokslukerprisavnsvarleg i Stiftelsen Lese Christian Goveia Jacobsen, forfattar og fagleiar ved Norsk barnebokinstitutt Steffen René Marandon-Sørum, og Silje Eggum, teamleiar ved fylkesbiblioteket i Vestfold, dei som skapte og driv Sommarles. Redaktør i Bok & bibliotek Arne Olav Hageberg var ordstyrar.
Oddmund Kårevik fortel først kvifor han skreiv innlegget om Sommarles og om reaksjonar han har fått. Deretter kjem panelet innom juks og gamification, kven Sommarles passar for, leseeffekt og ferdigheitsutvikling, Sommarleseforteljinga, teikneseriar og andre tekstfattige bøker, skjermbruk og digitalt grensesnitt, litterær kvalitet, representasjon og mangfald, og endå litt til.
Det kom også kloke innlegg frå salen.
Periskop.no er eit tverrfagleg, redaktørstyrt nettidsskrift for journalistikk om og kritikk av kultur retta mot born og unge.
Arrangementet var støtta av Fritt Ord.
