Vil stoppa KI på Kulturfond
KI-genererte illustrasjonar i barnebøker bør diskvalifisera for innkjøp. Det meiner utvalet som vurderer skjønnlitteratur for born og unge. No ber dei Kulturrådet om oppdaterte retningsliner.
Utvalet har møtt fleire tilfelle av bøker med KI-skapte illustrasjonar i 2024, og tendensen har auka gjennom 2025 og inn i 2026. Utvalsleiar Morten Olsen Haugen er klar på kva som er i spel.
«Vi er opptatt av at KI er en reell konkurrent til kunstneriske yrker. Det er yrker som skal fremmes gjennom Kulturrådets virksomhet», seier han til periskop.no.
Har avslått fleire
Utvalet tilrår at Kulturrådet endrar retningslinjene for innkjøpsordninga slik at bøker skapt med bidrag frå KI-modellar ikkje kan kjøpast inn. Haugen stadfestar at dei allereie har avslått titlar på grunn av KI-genererte illustrasjonar.
«Vi nå ser mer enn glossy illustrasjoner av typen søte dyr i fargesterke landskap. Vi ser også neddempede omslag for eksempel med imitert kullstift», seier Haugen.
Så langt har utvalget dekning for avslaga i dagens retningsliner, som krev tilstrekkeleg kunstnarleg, språkleg og handverksmessig kvalitet. Men dette er ikkje nødvendigvis nok når KI-genererte bilete brer om seg i fleire stilartar og teknologien utviklar seg, skriv Periskop.
Ønskjer økonomiske konsekvensar
«Vi ønsker oss at forlagene allerede ved påmelding må krysse av for at boka ikke er et KI-skapt verk. Dersom vi ikke skulle oppdage bruken av KI, og det kommer fram i ettertid, foreslår vi at forlagene skal måtte betale tilbake innkjøpsbeløpet», seier Haugen.
KI-illustrasjonar førekjem langt oftare i den selektive ordninga, der utvalet behandlar bøker frå småforlag og eigenutgjevarar, enn i den automatiske ordninga, der dei fleste etablerte forlaga deltek.
Rådet: – Følger nøye med
Leiar i Kulturrådet Kristian Seltun varslar at dei vil følgja opp tilrådingane.
«Kulturrådet er opptatt av ulike måter KI virker inn på, og følger nøye med på det. Bruk av KI i kunst og kultur er et sammensatt tema som det tar tid å sette seg inn i. Det er viktig at vi har dialog med kulturfeltet, og at vi ikke forhaster endringer i våre tilskuddsordninger», seier han.
Også i fjorårets rapport ba utvalget om endringar i retningslinene, men utan at noko har skjedd så langt.
