Epstein-filene
Bibliotekforeininga set beskyttarskapen på pause
På tysdag fortalde vi at styret i Norsk bibliotekforening hadde diskutert om dei skulle behalda beskyttarskapen frå H.K.H. Kronprinsesse Mette-Marit. Konklusjonen deira var då å avventa situasjonen. No set dei beskyttarskapen på pause.
På måndag skreiv Norsk bibliotekforening på nettsida si at dei ville «... avvente eventuell nærmere informasjon som kommer». I dag skriv dei dette:
«Kronprinsesse Mette-Marit er høy beskytter for Norsk bibliotekforening. Tidligere denne uken ba vi Det norske kongehus om mer informasjon om kronprinsessens relasjon til den overgrepsdømte Jeffrey Epstein. Norsk bibliotekforening har behov for mer kunnskap og klarhet i saken. Vi er informert om at det vil ta tid før en utfyllende redegjørelse foreligger.
Bibliotekene er demokratiske institusjoner bygget på åpenhet og trygge arenaer – særlig for barn og unge. Som interesseorganisasjon for biblioteksektoren er demokrati, tillit og trygghet viktige verdier vi verner om.
Informasjonen som så langt er kommet frem, gir grunnlag for kritiske spørsmål. På bakgrunn av nåværende situasjon har Norsk bibliotekforening besluttet å sette beskytterskapet på pause.»
Kjem til å ta lang tid, ifølge Slottet
Vi spør leiar Helene Voldner i Norsk bibliotekforening kva som har endra seg sidan sist.
– Sidan førre utsegn frå foreininga har vi hatt dialog med Kongehuset. Vi etterspurde informasjon om den vidare gongen i saka og tidsperspektivet og fekk informasjon om at det sannsynlegvis ville ta lang tid.
– Har de fått mange førespurnadar i løpet av veka?
– Vi har hatt dialog med eigne medlemer og tillitsvalde, som er viktig for oss.
– Var det planlagt konkrete arrangement eller andre ting saman med Kronprinsessa som no er avlyst som følge av at beskyttarskapen er sett på pause?
– Det var ingen planlagde arrangement eller samarbeid, svarar Voldner.
Høg temperatur i kommentarfeltet
Det er tydeleg at denne saka engasjerer og skapar sterke kjensler hjå mange.
Det vi skreiv om NBF-styret sitt vedtak på måndag blei delt på Facebook. Dette er vanleg. Det som ikkje blei som vanleg, var engasjementet i kommentarfeltet. I skrivande stund har innlegget fått 78 kommentarar.
Meiningane er delte. Mange tek til orde for at NBF må takka blankt nei til vidare beskyttarskap frå kronprinsessa. Andre rosar foreininga for å sjå saka meir an.
Her er innlegget som har fått rekordmange reaksjonar:
