– Akkurat no går ingenting ut frå Mo i Rana

– Dette har stor påverknad på heile infrastrukturen i biblioteksektoren. Vi er i ferd med å områ oss – og det trur eg gjeld mange aktørar, seier direktør Grete Stuevold Madsbakken i Nasjonalbiblioteket til Bok & bibliotek.

Ingen purringar frå NB

Tysdag kveld la Nasjonalbiblioteket ut ei melding på bibliotekutvikling.no der dei varslar at utsendingar frå Depotbiblioteket vil bli forseinka i tida framover. NB ser no etter alternative løysingar for transport av fjernlån frå Depotbiblioteket, og for bokpakker og fjernlån frå Det fleirspråklege biblioteket.

– Akkurat no går det ingenting ut frå Mo i Rana. Vi jobbar med å få opp ei løysing for å få i gang transporten att, seier NB-direktøren.

Ho understrekar at biletet er samansett, fordi det handlar om meir enn utsending. Dei snakkar også med fylkesbiblioteka for å få eit betre bilete av situasjonen rundt returar til depotbiblioteket.

NB har også stansa alt arbeid med purringar og erstatningskrav inntil vidare.

– Vi skjønar at vi ikkje får noko tilbake når situasjonen er så uavklart som han er.

Viktig møte i dag

Onsdag har Nasjonalbiblioteket invitert alle fylkesbiblioteka, storbybiblioteka, og representantar fra universitets- og høyskolebibliotek til eit eige møte om situasjonen.

– Vi ønskjer å forstå kva fylka har behov for frå oss, ikkje minst kva informasjonsbehov dei har. Møtet i dag blir viktig for oss, seier Madsbakken.

Ho legg til at NB også vurderer om dei må gjera mellombelse justeringar i Biblioteksøk-tenesta – men er klar på at dei ikkje vil skru av meir enn nødvendig.

– Poenget er å ikkje skru av det som framleis verkar. Det er jo ikkje overalt i landet at NBT har vore hovudleverandør.

Beredskapsplanar – men ikkje for alt

Nasjonalbiblioteket har sine eigne avtalar med distributørar, men har ikkje noko overordna avtaleverk som gir dei høve til å koordinera eller overta ansvaret for andre aktørar sine transportavtalar.

– Det finst ikkje eit slikt overordna avtaleverk der Nasjonalbiblioteket har ansvar for heilskapen. I fylke og kommunar har ein sine eigne transportavtalar. Vi er ikkje part der, seier Madsbakken.

– Kva tenkjer du om at dette kunne skje? Var det overraskande? Eller har de i Nasjonalbiblioteket følgt med og vore litt skjelven i nikkersen den siste tida?

– Vi har vore klar over at det har vore utfordringar i NBT, og vi har planar for korleis vi løyser eigen distribusjon om noko skulle skje. Men dei dekker nok ikkje alle element i ein slik akuttsituasjon, som ein heilskapleg plan for informasjonsdeling og korleis alle detaljar kan løysast. Dei handlar meir om kva alternative logistikkløysingar som finst, svarar Grete Stuevold Madsbakken.